14 ديسمبر، 2009

غناوي..

من كتاب غنّاوة العَلَم لأحمد يوسف عقيلة

فضَّيْت للعزيز مكان ... إن جاه جاه ما جاه مَولْحد
ـ ـ ـ
عَلَيك غَيْر مَو شَكّاك ... العقل فيه زَيْناتَك اشْوِي
ـ ـ ـ
ملَيْت مِن عزيز انْظري ... تْمُوْت يا غَلا ما تْهمّنِي
"عبدالكافي البرعصي"
ـ ـ ـ
يضيقن الاّ بعزيز ... أقطَع عقولنا ويش ياسعَن
"عيسى بوالقوّالة"
ـ ـ ـ
غَلاه جا اصْداف اَيّام ... بلْهُون ما عزيز يلُوْمنِي
"سليمان الشرِّيمة"
ـ ـ

ما عرفت بَيش العين ... اللي وشوشوها فارحة
"عبدالعزيز العوّامي"
ـ ـ ـ
عزيز في وطاة العقل ... نزَل يريد يستاسَع ملَك
"عبدالحميد يحيى"
ـ ـ ـ
امغَيْر ما اغْلِيْت عليه ... عزيز ما اغْلي غَيْره علَي
"عبدالرازق بوالدعبسيّة"
ـ ـ ـ
عَلَيك يا سريب عَزيز ... اكْبِرت غَيْر عَقلي ما اكْبِر
"عبدالعاطي خنفر"
ـ ـ ـ
عَلَيْما مشَيْت وراك ... ابْطلْت ما غَواياك حَوددَن
"خليفة غيث"
ـ ـ ـ
طَرّاي كنْت عَ اللَّوْلاف ... وانْقَصَوا غَيْهَبَونِي ف الغَلا
"عيسى بوالقَوّالة"
ـ ـ ـ
عَلَى اِيْدنا بذَرْنا صَوْب ... وحْصاده عَلَيْ دَيْن غَيْرنا
"منعم سَيْويد"
ـ ـ ـ
وصَّونِي عَلَيْه اعْزاز ... النَّقْص غَيْر دارَوْه هم اللي
"فضل الله إدريس"
ـ ـ ـ
سريت له ونا مَمطور ... شكيع برق في دار القْدم
ـ ـ ـ
اعْزاز حادفَوه العَقل ... بِمْواجِع وهو ناطُورهم
"حميد السعيطي"
ـ ـ ـ
ابْطلت كلّ يوم انْطِيْح ... مِن قَول حِمّدَيْن وساهلة
"الناجي بوجهَيم"
ـ ـ ـ
امْغَيْر هو عَذاب النار ... كَوّاي داي ما جا ع الوجَع
ـ ـ ـ
السّا انْدَوّرَك وانْجِيك ... خَلِّيك يا شقا في مَطْرحَك
"موسى بونقاب"
ـ ـ ـ
مشَن أيّام لملاقاة ... واليوم يا غوالِي عَ الْخَبَر
ـ ـ ـ
قطَعْت يا عَزيز لْواي ... حتَّى في منامي نلْتفِت
"إبراهيم سعد"
ـ ـ ـ
اوْحلْت في عَزيز غَشِيْم ... غَلاه جار والصَّوب ما عَرَف
ـ ـ ـ
من خَوف الْملاقا فيه ... مَسْرَب اعزاز مابَيْت نلقْطه
"شمس الدين عمر"
ـ ـ ـ
انْمَيْعِد معَ لَوْلاف ... سماحة الغَلا مَو مْراسلة
"إبراهيم بوعزيزة"
ـ ـ ـ
العَيْن مِن رغَبْها فِيك ... رمِيْش هدبْها مَيْ حاملة
"عبدالكافي البرعصي"
ـ ـ ـ
اللي اليَوم بالتّمْوِيْح ... شرْبَن غَلاه ياما بلَوحِّن
ـ ـ ـ
اللوْعَة طويلة عمْر .. لُو كان الغَلا عاش كَيفّا
"موسى بونقاب"
ـ ـ ـ
ظلامَك يْحُوْز عَزيز ... هَذا عَلَيْش يا لَيل كارْهَك
"عبدالكافي البرعصي"
ـ ـ ـ
باهي اللي مازال ... يمْشِيْ العَقل ويْجي وما اذْهِب
"خليفة الشلماني"
ـ ـ ـ
الناس عِيْدها عَ الْحَوْل ... ونا يَوْم عِيْدي تَوقْته
ـ ـ ـ
نظَر العَيْن تَرْجَى فِيْه ... قَصَّر اخْطاه جَيّاب النّبا
"عاشور بوجازية"
ـ ـ ـ
تقُول كَسَب مَوْش حَلال ... مَنْزُوْع شخْب عَيْنِي للخَلا
"إبراهيم سعد"
ـ ـ ـ

هناك 14 تعليقًا:

  1. يجولن خيول غلاي ... وع الخروبة يرجعن

    علاء
    ـ ـ ـ

    ردحذف
  2. عَلَيك يا سريب عَزيز ... اكْبِرت غَيْر عَقلي ما اكْبِر

    ـــــــــــــــــــ
    رحمك الله ياعبدالعاطي خنفر

    شكراً لك أحمد يوسف ، أنت تسير في طريق غير معبد ، لكنني على ثقة في اختياراتك ، نحن نتظر المزيد من ها الابداع المدهش

    عبدالباسط ابوبكر محمد

    ردحذف
  3. الأستاذ / أحمد عقيلة
    رائع دائماً في إختيار الموضوع .. رائع في كتاباتك .. رائع وأكثر ..
    أهديك بعض مما وصلت إلي من غناوي من رجال زمن مضى ..
    ( جروح قبل بريانات خطمت يا دعي حاييتهن )
    ( غيات في زمان عكاس فواهق ردى دايراتلي )
    ( اياما وانت احذاي ياما زهن الانظار واليوم ياما يذرفن )
    هذه الغناوي أن صح أنها غناوي من أبناء الحضر من درنة وبنغازي ( من ابناء جمعية عمر المختار ) أعتذر عن تسميتهم ..
    ولكن هل هذه غناوي علم ؟

    ردحذف
  4. أحمد بوسف عقيلة23 ديسمبر 2009 في 2:04 م

    أهلاً بك.. نوّرت الخروبة.. الثالثة ليست غناوة.. طالت وتجاوزت الوزن..

    ردحذف
  5. من اجمل غناوي عبدالكافي البرعصي الله يرحمه


    عزيز مقعده جا موح ..... تنوي دناه ياعين تقصري .....


    سالم البيضا .....

    ردحذف
  6. مادي العكر091474455913 مايو 2010 في 3:02 ص

    رد ألي لأخ أو لأبناءجمعيه عمر المختار في غناوه تقول خطاهم عليش وليش ,,,ينشد ايقول مازال خاطري.2)هناك من يقيم الصوب,,,وهناك من أيكافي بالخطاء.3)خطاك كيف نحكي بيه,,,وناغلاك حاكيه للعرب) وفي غناوه للمرحوم عبدالكافي يقول مليت من عزيز أنظري ,,,تموت ياغلا ماتهمني

    ردحذف
  7. شكراً على المجهود الرائع

    ردحذف
  8. علي بورسم
    الشاعر محمد بودزة الفاخري :

    ما لقيتها في ناسي * تجيني من اللي يجرحوا في احساسي
    اصحاب المصالح والضمير القاسي * بلا عيب ساير قاطعين ارحامي
    واخذ طريق الصدق هو نبراسي * بيه انتمسك لا نهار ختامي
    وما زالت شامخ ما نواطي راسي * حتى لو يزيدن كل يوم الامي
    مغير ضرني فيهم غوالي ياسي * خيوط المحبّة قبّهن بالحامي
    علي ما جرا ما زلت ماني ناسي * اصحاب الغلا كيف انهم قدامي

    ***
    ما لقيتها ف اصحابي * تجيني من اللي ما عليهم عابي
    ولا عمرهم تمّوا معاي مصابي * اللي بينهم شاوي اليوم مقامي
    رزقي مو علي من جاهلين حسابي * رزقي علي عالم اعداد ايامي
    ولا عد يكونوا من جديد احبابي * عليهم غسلت ايديْ يا جرامي

    ***
    ما لقيتها في اللي عليه اللومة * تجيني من اللي لي تم خصومة
    نذراً علي ان ما ابعد من الحومة * بعيد مالعدو نا اللي نشيل اخمامي

    ردحذف
  9. تعالو زورونا في شاتنا متواضع شات ومنتديات الكرامة ليبيا
    http://alkarama.aljup.com

    ردحذف
  10. ‏يا فاهــق عزيز ‎الــغــبــر 💔

    يعلم الله‎ مـاانـي_قـادرك 😔..

    ردحذف
  11. عرب مادارو فيك أشوي
    أتموتي وأنتي جرحك حي

    ردحذف
  12. لا قوة الا بالله تحياتي لك أستاذ أحمد

    ردحذف